Eth secretari generau d’Unitat d’Aran e conselhèr generau, Francés Boya, defen qu’era demana de mielhora dera N-230 includisque non sonque eth tram comprenut entre eth tunèl e Vielha, “fòrça urgenta”, senon tanben era reforma intègra dera carretèra, ath sòn pas pera Val d’Aran, entà garantir era seguretat des sòns usatgèrs. “Tà nosati ei fonamentau melhorar dejà e en prumèr lòc era pòrta principau d’accès a Aran, mès tanben ei de besonh abordar eth traçat intègre, en tot crear variantes que permeten respectar eth miei ambient e liberar de trànsit pesant as pòbles que patissen mès era N-230, coma Vielha, Aubèrt, Bossòst e Les”, segontes a explicat.
 
Tà Boya, “ei fòrça important qu’aguesta demana compde damb eth consens de totes es institucions, mès tanben des partits politics e es ciutadans”. Per aquerò, exigís qu’eth manifèst pera mielhora dera N-230 sigue “dubèrt” as partits politics damb representacion en Conselh Generau d’Aran.