Damb eth lèma Amassadi entà Auançar, eth Congrès a renauit atau madeish era comission executiva en tot crear cinc naues secretaries d'airau damb Joan Riu coma secretari d'Accion Municipau e Organizacion, Amador Marqués coma secretari de Comunicacion e Relacions Exteriors, Maria Vergés coma secretària d'Accion Politica, Noelia Costa coma secretària d'Accion Sociau e Ciutadania, e Àlex Sirat coma secretari de Formacion e Innovacion.

Entath Congrès i an assistit eth president deth Govèrn d'Aragon e secretari generau des socialistes aragonesi, Marcelino Iglesias, eth conselhèr d'Agricultura, Alimentacion e Accion Rurau e prumèr secretari deth PSC des comarques de Lleida, Joaquim Llena, eth president deth grop parlamentari sociaudemocrata d'Andorra, Jaume Bartumeu, atau coma representants deth sindicat CCOO e des partits de CDA, PRAG, ERC e IV-Aran.

Enes sues intervencions, Francés Boya a defenut "un nau aranesisme entenut coma un projècte plurau, transversau e integrador que prebotge era construccion nacionau d'Aran coma país de ciutadans liures, iguals e solidaris". "Eth projècte de nau aranesisme aspire a consolidar a UA – PNA coma er èish centrau dera institucionalitat e dera construccion nacionau d'Aran, era principau fòrça municipalista e de proximitat, e era referéncia des politiques de progrès sociau, economic e ambientau", atau coma a proclamat.

En aguest sens, Arturo Calbetó, qu'a clausuarat eth Congrès, a explicat qu'Unitat d'Aran – Partit Nacionalista Aranés "apòste pera volentat de somar e seguir representant ara majoria de ciutadans, per miei d'un projècte modernizador que concep Aran coma realitat nacionau a compartir e derivada dera volentat des persones que la formen d'ençà de diuèrsi encastres sociaus e ideologics".