Er objectiu ei “tractar sus es infraestructures deth sègle XXI en marc d’ua estratègia transfronterèra que melhore es vies de comunicacion e garantisque era connexion telecomunicativa entre andús costats dera termièra”, segontes a anonciat eth Sindic dempús dera amassada qu’a mantengut damb Lépinay ena sua visita entà Aran. Francés Boya a assegurat qu’eth Conselh Generau e er Ajuntament de Sant Gaudenç trabalhen amassa ena elaboracion d’un projècte “entà amiar entà dauant era connectivitat entre andús punts per miei dera fibra optica”.

Atau madeish, andús representants s’an reafirmat en compromés entà “articular en hilat era atencion sanitària” entre Aran e es espitaus de Sant Gaudens, Luchon e Tolosa, damb era finalitat de “definir melhor es servicis de cada centre respècte ara atencion qu’an de prestar entàs usatgèr d’un costat e un aute dera frontèra”, en paraules deth Sindic. En aguest sens, es equips directius e tecnics des quate espitaus an mantengut ath còp ua amassada de trabalh, a on an avalorat positivament era melhora deth protocòl d’emergéncies qu’es servicis sanitaris meteren en marcha eth passat mes de mai.

Era trobada, era dusau qu’a lòc entre Boya e Lépinay dempús qu’eth Sindic visitèsse Sant Gaudens a finaus de junhsèga, a servit entà establir ua estratègia comuna ena definicion e melhora de projèctes de cooperacion e ofèrta transfronterères, coma eth deth camin istoric entre Sant Bertran de Comenges e Roda de Isábena, laguens deth nau Interreg Espanha-França.