Atau ac a manifestat era conselhèra de Sanitat e Servicis Sociaus, Noelia Costa , qu’a declarat qu’er objectiu deth convèni ei “redusir tant es desplaçaments coma eth temps de demora qu’an de patir es usatgèrs aranesi”.

Era conselhèra Costa a explicat qu’eth convèni daurís era pòrta ara cooperacion des dera complementarietat e non pas era competéncia, en tot respectar era autonomia mútua d’andús sistèmes sanitaris. De hèt, era collaboracion permeterà solventar en bona part era manca de professionaus de quauques especialitats en tot prebotjar eth sòn intercambi, atau coma era sua era formacion e reciclatge. Atau madeish, eth convèni establís era accessibilitat as naues tecniques que se desvolopen enes centres der ICS, especiament en Espitau Aranau de Vilanova de Lhèida, ath quau s’i destinen eth 90 % des derivacions der Espitau Val d’Aran, e tanben en espitaus terciaris de referéncia coma eth dera Vall d’Hebron.

Er intercambi esvitarà era competéncia entre servicis e darà pas ara optimizacion deth profitament des recorsi publics respècte as installacions, tecnologia e professionaus pr’amor que se poirà usar quinsevolh espaci o unitat des entitats deth SAS o der ICS, de forma qu’un pacient poirà èster assistit peth sòn mètge aranés en un centre der ICS. Entà d’açò, s’elaboraràn diuèrsi protocòls d’actuacion.

Cau tier en compde qu’er Institut Catalan dera Salut gestione 8 espitaus, 272 equips d’atencion primària, 40 centres d’especialitats extraespitalàries, 32 centres d’atencion urgent, 8 laboratòris d’anàlisis cliniques, 32 servicis de radiologia, 15 servicis de reabilitacion e 8 centres de salut mentau, qu’amassa formen ua plantilha de 39.000 professionaus.

Imatge de la roda de premsa. Imatge de la roda de premsa.