Aguesta actuacion forme part deth Plan de mielhora des equipaments publics, que sage de contribusir ara mielhora des infraestructures basiques der autogovèrn e balhar avientament es servicis transferits. Eth Plan compde damb un pressupòst totau de 4 milions d’èuros, finançadi pera Generalitat e eth Conselh.

Eth conselhèr de Miei Ambient e Pagesia , Francés Bruna, a explicat qu’era naua sedença “darà mès autonomia e mès comoditat as servicis e ath personau d’ua des competéncies mès importantes que gestione era maxima institucion aranesa”. Bruna a declarat que “ara ei un bon moment entà amiar entà dauant aguesta òbra, perque ocuparà a persones en uns moments de manca de trabalh, e afronte es naui besonhs pròpris d’ua administracion joena e en expansion coma ei eth Conselh Generau”. Ath delà, “se dignificarà tant era bastissa com er entorn”, en cap dera vila de Vielha.

Era parcèlla, plaçada en carrèr Major de Vielha, ocupe ua superfícia de 267 m2. Eth projècte tracte de mantier era simplicitat dera construccion tradicionau aranesa per miei d’ua bastissa de superfícia similara ara existenta. Se bastiràn es burèus e espacis collectius entà amassades e recepcion deth public. Damb aguesta actuacion, “se mielhorarà notablament era imatge actuau, en dar ua imatge mès ordenada, sòbria e clara”, segontes era memòria elaborada pera oficina tecnica deth Conselh.

Eth Govèrn aranés a previst de condicionar un aute locau en Vielha entà dar cabuda ara associacion des Volentaris d’Aran, qu’ara utilize era antiga casa forestau coma era sua sedença.

Era casa forestau de Vielha. Era casa forestau de Vielha.