Era aubèrja, que tornèc a aufrir es sòns servicis ena primauèra de 2008 dempús de dus ans de barrament, a previst d’acuélher mès de 3.000 estàncies en ostiu (deth 24 de junh enquiar 11 de seteme), segontes a informat eth vicesindic 3au e conselhèr de Torisme, Comèrç e Transpòrt, Juan Antonio Serrano, de visita entàs òbres.

Serrano a avalorat era redubertura coma “satisfactòria”, pr’amor que se complís damb un des objectius qu’eth Govèrn s’a mercat damb era dinamizacion deth torisme juvenil en Quate Lòcs. Es òbres consistissen enes adequacions des accèssi entàs persones discapacitades atau coma deth sistèma de seguretat electrica e d’auti acabats des crambes e eth conjunt dera bastissa e es entorns.

Per un aute costat, Torisme Juvenil dera Val d’Aran (TOJUVA) a alongat, enquiath 5 de junh, eth tèrme d’inscripcion entà toti es interessats entàs activitats programades laguens dera iniciativa Er ostiu ei tòn (L’estiu és teu), dera Generalitat, qu’auràn lòc ena aubèrja Matacabòs deth 23 d’agost enquiar 1 de seteme.

Se tracte d’ua estada multiesportiva entà mainatges e mainades de 5 a 16 ans, tant d’Aran coma de Catalonha. Aguestes estades combinen diuèrses activitats d’espòrts d’aventura mentre es joeni se divertissen e aprenen a convíuer. Es resèrves s’an d’efectuar en portau web www.xanascat.cat o en telefon 93 483 83 63.

Matacabòs de Les. Matacabòs de Les.