En matèria d’inversions, eth Conselh d’Aran a destinat 4,3 milions d’èuros ara sanitat en periòde 2005 – 2009, entre es quaus destaque era inversion de 2,2 milions d’èuros en bastiment dera naua residéncia geriatrica Sant Antòni, en an 2009. Tanben a previst dedicar-ne 450.000 èuros mès entà mielhorar installacions e equipar damb mobilièr eth centre dera gent grana.

Er equip directiu a destacat eth “saut important” qu’en an 2007 s’a produsit en pressupòst dera sanitat, de lèu 12 milions d’èuros. En 2006 se plaçaue enes 10 milions e, segontes es previsions, se pòden arténher es 15 milions de pressupòst en 2011.

En aguesti moments, eth sistèma non ei endeutat e compde damb un bon finançament, pr’amor que “non a dubèrt cap linha de crèdit, a despièch qu’ei ua opcion que pòt hèr a servir”, segontes Grau. En generau, era satisfaccion der usatgèr ei superiora ara mieja catalana, d’acòrd damb es enquèstes e es informes de quèishes disponibles.

Eth SABS a creat ua Unitat de Contròl dera Gestion. Maria Àngels Borràs a assegurat que “cau potenciar era estructura dera gestion e mielhorar era confidança des ciutadans damb era sanitat aranesa”. Per aguest motiu, eth Govèrn aranés e eth SABS an proposat crear ua comission de seguiment damb representacion de toti es grops politics. Er acòrd s’a prenut per unanimitat.

Dera sua part, eth sindic Francés Boya a declarat que “Aran compde damb un bon sistèma sanitari, que foncione corrèctament, mès cau reconéisher tanben que cau seguir trabalhant entà mielhorar-le”.

Eth Plen deth Conselh Generau. Eth Plen deth Conselh Generau.