Era comission, iniciativa deth Conselh Comarcau deth Pallars Sobirà, s’amassarà dus viatges ar an entà estudiar es formules de collaboracion toristica e crear vincles entà promocionar eth Pirenèu aranés e catalan. Es resultats des sòns trabalhs se haràn a arribar as airaus administratius de cada territòri en encastre dera promocion economica e toristica damb era finalitat de melhorar era interrelacion entre eri.

Eth vicesindic 3au e conselhèr de Torisme, Comèrç e Transpòrt, Juan Antonio Serrano , a explicat que “ei de besonh encetar naues collaboracions damb es territòris vesins damb er objectiu de possar e definir ua estratègia conjunta entà dar a conéisher era mèrca Pirenèus”. Entà Serrano, aguesta mèrca “ei frut d’ua realitat diferenta que sonque compartim es territòris de montanha coma destinacions toristiques de qualitat”. Pr’amor d’açò, eth conselhèr a reivindicat “era identitat pròpria des Pirenèus tant pes sòns valors paisatgistics, culturaus, gastronomics, coma pera idiosincràsia dera sua gent e eth sòn caractèr acuelhedor, que hèn d’aguest un encastre unic en sòn entorn e ena Euròpa deth sud”.

Era sua reivindicacion ven determinada pera “dissolucion d’aguesta identitat en encastres toristics mès amplis que hèn a pèrder es valors pròpris, atau coma pera manca de coordinacion e colaboracion entre es disparions territòris que ne formen part”. En aguest sens, era creacion d’ua comission de torisme “a de servir entà recondusir aguestes mancances istoriques e possar ua votz pirenènca mès unida e fòrta des deth punt d’enguarda dera sua identitat toristica, pr’amor qu’ei era melhor forma de hèr a arribar ara gent er interès per parçans tant petiti coma es nòsti”.

Era comission. Era comission.