Era actuacion contemple dues fases que coincidissen damb es dus accèssi diferenciadi: era plaça institucionau (1a fasa) e er àmbit administratiu d'usatge entàs ciutadans que requerissen es servicis dera maxima institucion (2au fasa). En aguesti moments, es òbres se centren ena prumèra fasa qu'afècte ara plaça institucionau (1.268 m2) e que supòsen ua inversion de 254.500 èuros.

Emilio Sanllehy a explicat que "era volentat deth Govèrn ei ordenar e dar coeréncia as espacis existents entre era Avenguda Pas d'Arró e eth crotzament der arriu Nere e eth Garona, damb era intencion de hèr mès espacis entàs passants". D'acòrd damb es paramètres qu'a indicat er Ajuntament, se preten qu'era plaça e eth sòn entorn qu'actuaments se destine entà zòna de parcatge constituïsque un espaci destinat entà comunicar zònes urbanes de Vielha. Aguesta decision permet amendrir er impacte de veïculs ena plaça e liurar de servituds era plaça publica de naua creacion. Sanllehy a destacat qu'era plaça "devierà un espaci viu damb era creacion d'un nau punt d'amassada entà actes institucionaus e punts de léser ath cant der arriu".

Era reforma der espaci d'amassada institucionau incorporarà era escultura ara lengua e cultura araneses der artista André Ricard, encomanat pera associacion Lengua Viua, en tot conformar un espaci idonèu entara realizacion d'actes e celebracions. Ath delà dera connexion fisica e visuau d'airaus de Vielha, era naua plaça aurà un dessènh sufisentaments foncionau e atractiu entà perméter qu'es passants i circulen damb comoditat e lo utilizen coma un element abituau.

Eth tractament dera superfícia se realizarà damb un solet tipe de materiau deth país, eth granit, mès en tot diferenciar es espacis damb era textura, era mesura e era disposicion des pèces tà pr'amor de diversificar es zònes que se creen: de passejada, de descans, de léser, de relacion vesinau e de comunicacion e armonia damb eth mobiliari urban, era jardineria e es installacions. "Er objectiu finau ei arténher un espaci agradiu, caud e propèr as ciutadans que represente eth sòn autogovèrn", a referit Sanllehy.

La plaça del Consell General d'Aran, en obres. La plaça del Consell General d'Aran, en obres.