D’un aute costat, es busi que realizen eth servici intèrn de transpòrt public an previst aplicar era emission automatica de tiquets, en madeish veïcul. Aguest nau sistèma, que se meterà en practica en mes de hereuèr, incremente era comoditat des viatgèrs e permet dispausar dera estadistica diadera des usatgèrs enes diferents servicis.

Damb aguestes donades, eth Conselh harà un estudi sus es usi e besonhs des persones qu’utilizen eth transpòrt public damb er objectiu de mielhorar es servicis e era mobilitat ath laguens dera Val d’Aran. D’aguesta forma, eth Departament de Torisme, Comèrç e Transpòrt prevé ajustar es freqüéncies e es oraris des busi, se calguesse e atau ac recomanen es informes.

Es tiquets des viatgèrs garantissen ua assegurança obligatòria entàs viatgèrs, dera quau toti es usatgèrs en son beneficiaris. Aguest tipe d’assegurança curbís es indemnizacions per lesions corporaus e mòrt coma era assisténcia sanitària der accidentat. Eth sòn còst ei includit en prètz deth bilhet e, per açò, se recomane conservar eth tiquet enquiara fin deth trajècte, coma justificant qu’acredite era condicion de viatgèr.

Ath delà, eth conselhèr Juan Antonio Serrano a hèt un prumèr balanç satisfasent dera metuda en marcha deth nau bus urban, qu’acabe d’incorporar naui elements identificatius, restacadi damb era mèrca toristica dera Val d’Aran e era imatge corporativa deth Conselh Generau d’Aran.

Aguest nau bus foncione damb energia de biodièsel e, per mor dera sua accessibilitat e comoditat, ei avient entara gent grana e es esquiaries e ciclistes que pòrten eth sòn equipatge. A ua capacitat de 25 places en sèti e 45 lòcs mès de pè.