Aguest Plan recuelh es besonhs sociaus deth país per miei d’ua diagnòsi exaustiva, qu’an elaborat amassa es Servicis Sociaus, eth Centre d’Atencion Precoça e er Espaci entath Ciutadan en Aran (ECA). Eth desvolopament d’aguest programa sage de “impulsar ua atencion integrau ath ciutadan, mès enlà deth concèpte dera beneficiéncia”, segontes a declarat era vicesindica 2au e conselhèra de Sanitat e Servicis Sociaus, Noelia Costa. Eth Plan serà, totun, er esturment entà “desplegar en Aran en quatau pilar der Estat de benèster”.

Per un aute costat, eth SAS, que compde damb un pressupòst de 13,7 milions d’èuros, prestarà, a compdar d’enguan, naui servicis d’atencion sanitària damb er objectiu d’esvitar es desplaçaments des usatgèrs. Er Espitau Val d’Aran balharà eth servici de quimioteràpia en règim de severitat redusida damb era collaboracion der Espitau Sant Pau de Barcelona. Atau madeish, s’implementaràn es servicis Holter–monotorizacion ambulatòria de pression arteriau (MAPA) entà hèr seguiment dera activitat cardiaca e arteriau, qu’es pacients aranesi an utilizat normaument en Lhèida. Eth SAS a previst d’ampliar eth servici d’obstetrícia e ginecologia damb mès personau e reforçarà eth servici de cirurgia damb era incorporacion de dus professionaus en règim de rotacion (un de fixe e un aute de refòrç). Entà assegurar era prestacion deth servici de forma ininterrumpida, atau coma ven de succedir, eth Conselh formalizarà, per miei d’un convèni, era collaboracion cirurgica qu’a encetat damb er Espitau de Santa Tecla de Tarragona. Ath delà, er Espitau aquerirà ua naua maishina–làser que netege es lents dera gent que patís de catarates.

Era conselhèra Costa a anonciat qu’eth Conselh Generau presentarà, enes pròplèu dies, era sua propòsta d’ampliacion der Espitau Val d’Aran, que, en tot doblar possiblament era actuau bastissa, acuelherie un nau blòc quirurgic e un reformat airau d’urgéncies. Costa a informat tanben que s’equipararàn es estructures dera direccion assistenciau–sanitària damb es dera direccion de servicis sociaus dauant des naui besonhs derivadi des obligacions dera lei dera dependéncia que ne sobredimensionen es servicis. En aguest procès, ei previst d’amassar es Servicis Sociaus damb er ECA en un madeish emplaçament fisic.

Eth Conselh prèste naui servicis sanitaris entà esvitar desplaçaments. Eth Conselh prèste naui servicis sanitaris entà esvitar desplaçaments.