“Aguesta intervencion ei era prumèra òbra importanta que desvoloparà eth Govèrn aranés en Musèu dempús dera sua creacion enes ans ueitanta”, segontes a explicat eth sindic d’Aran, Francés Boya, que s’a mostrat fòrça satisfèt per “possar era reforma qu’a de perméter actualizar e modernizar un des equipaments museïstics, artistics e istorics mès emblematics dera Val d’Aran”.

Eth Musèu a demorat fòrça envielhit dempús de decades en qué s’an efectuat pògues intervencions de reforma e es justes de manteniment. Eth sindic, qu’a volut arreconéisher “era solvéncia e era ambicion” deth projècte museïstic originau, s’a mostrat convençut que “ara mos cau méter ath dia es installacions, ath nivèu des estàndars actuaus des equipaments etnologics e des valors culturaus, patrimoniaus e toristics qu’aguesti an de transméter”.

Es òbres començaràn ena tardor entà pr’amor de non interrómper era activitat museïstica pendent era sason der ostiu, quan mès afluéncia de visitaries an es installacions. Eth projècte contemple era reforma parciau dera planta baisha e es plantes prumèra e dusau entà adaptar er equipament ara normativa d’accessibilitat entàs persones damb mobilitat redusida e era actualizacion des zònes d’exposicion. D’aguesta forma, se mielhoraràn es installacions e es acabats dera façada, en tot adaptar er ascensor, cambiar es hièstres, reformar es zònes d’exposicion, adaptar era installacion electrica e plaçar un nau sistèma de cauhatge e enlumenatge.

Eth Musèu dera Val d’Aran, creat en 1984, acuelh ua exposicion permanenta sus era istòria d’Aran dera preistòria enquiàs nòsti dies, per miei d’ua interessanta colleccion d’objèctes arqueologics, artistics e etnografics. Era bastissa, plaçada en Cap dera Vila de Vielha, date aumens der an 1610, moment en qué Aran se trape en ua situacion de prosperitat economica.

Eth Musèu dera Val d’Aran. Eth Musèu dera Val d’Aran.