Era vicesindica 2au e conselhèra de Sanitat e Servicis Sociaus, Noelia Costa , a explicat que “damb aguest servici se daurís un nau orizon enes labors assistenciaus, preventives e educatives, en tot mielhorar era qualitat de vida e eth miei dera persona beneficiària”, es requisits d’accès dera quau se definissen ena ordenança aprovada per unanimitat. Era normativa fixe es barèms d’autrejament entara prestacion deth servici atau coma eth prètz public d’ajut a domicili, avalorat en 16 èuros per ora. D’aguesta forma, se contemple era possibilitat de contractar ua empresa especializada que prèste era atencion a domicili, entara quau eth Govèrn d’Aran a abilitat 50.000 èuros de pressupòst.
Eth Plen deth Conselh Generau a dat lum vèrda, per unanimitat, ara aprobacion definitiva dera lètra der imne d’Aran (veir document adjunhut), deth quau se n’auie hèt era aprobacion dera sua lètra de forma iniciau en deseme de 2008. Atau madeish, s’an aprovat es bases especifiques entàs Prèmis de Fotografia qu’autrege era maxima institucion e entàs Prèmis 17 de Junh, establidi en 2008 damb er objectiu de guerdonar annaument eth trabalh e era trajectòria des persones o entitats vinculades damb era Val d’Aran enes sectors dera Cultura, era Promocion Economica, er Espòrt e era Cooperacion e Accion Sociau.
D’un aute costat, eth Plen a aprovat era prepausa conjunta qu’eth Conselh Generau e es Ajuntaments d’Aran an consensuat, eth passat mes de març, sus eth nau traça dera carretèra N-230. Er informe plantege ath Ministèri de Foment dues alternatives de nau traçat dera carretèra N-230, en tot redusir es afectacions mieiambientaus damb era tipologia de via segregada en andús cassi. Es grops d’Unitat d’Aran (UA) e eth Partit Renovador d’Arties e Garòs (PRAG) i an votat favorablament, mentre que Convergéncia Democratica (CDA) s’i a abstengut.
Era session plenària a servit tanben entà hèr ua modificacion de crèdit pressupostari, que supòse un milion d’èuros d’injeccion entath reajustament deth projècte de reforma integrau dera residéncia geriatrica Sant Antòni e entà naues inversions en projècte deth parc de montanha de Eth Portilhon, en Bossòst. Ath delà, s’a dat compde dera prepausa de convèni damb era Sindicatura de Grèuges de Catalonha, peth quau se cree era figura deth Pròom dera Val d’Aran entara susvelhança e transparéncia des administracions deth país. Eth sindic Francés Boya a profitat entà felicitar ara comission dera Energia deth Conselh Generau peth “sòn trabalh e es sòns plan boni resultats, qu’an permetut de garantir es descompdes dera energia electrica entàs usatgèrs dera Val d’Aran”.
Session plenària Session plenària.
