Entath Sindic, era abilitacion d’aguest Hons per part deth Govèrn d’Espanha supòse “un esturment d’incentiu dera economia e eth trabalh en temps de crisi, atau coma des projèctes municipaus ena melhora des sòns servicis, equipaments o subministraments, que de cap manèra se pòt desaprofitar”. Pr’amor d’açò, eth Conselh Generau aufrís era sua ajuda d’orientacion estrategica entà projèctes compartits, en tot auer present qu’eth termini entà qu’es ajuntaments presenten es sollicituds de finançament des projèctes susceptibles d’èster costejadi peth Hons finalize eth pròplèu dia 24 de gèr. Aguestes sonque les poiràn formalizar es alcaldes o es secretaris des ajuntaments.

Es òbres finançades per aguest Hons, aprovat en Conselh de Ministres eth 28 de noveme, se considèren urgentes, e es actuacions auràn d’èster de naua planificacion (non contemplades en pressupòst de 2009). Era licitacion s’inciarà en prumèr mes dempús dera publicacion dera autorizacion corresponenta en portau web deth Ministèri d’Administracions Publiques (www.map.es), a on s’an d’efectuar toti es tramits. Es ajuntaments obtieràn es recorsi deth Hons enquia er impòrt maxim que se determine segontes era populacion deth municipi.

D’aguesta forma, eth Conselh Generau amplie era sua politica entà combàter era crisi en Aran, dempús d’auer activat en octobre un plan entà impulsar eth torisme, es politiques sociaus e es naues tecnologies, en tot accelerar era accion de govèrn ena modernizacion dera economia e era apòsta peth benèster sociau e era societat dera informacion e eth coneishement.