Eth Govèrn considère qu’eth traslat deth Plan ath Conselh crearie confusion enes ciutadans, pr’amor qu’era maxima institucion aranesa non a competéncies urbanistiques. En aguest sens, cau aclarir que son era Generalitat e es Ajuntaments es responsables d’amiar entà dauant eth Plan director urbanistic en base as sues competéncies, e cau remercar, atau madeish, qu’aguest Plan, proposat pera Direccion Generau d’Urbanisme dera Generalitat, ei frut deth Plan Territoriau aprovat en 2006 damb eth consentiment des Ajuntaments e eth Conselh Generau d’Aran, alavetz governat peth principau grop ena oposicion.

Eth Conselh Generau d’Aran collaborarà a acuélher ena sua sedença as representants dera Direccion Generau d’Urbanisme, es tecnics municipaus d’Urbanisme e es tecnics deth Conselh que dan supòrt as municipis petits en aguesta matèria entà analisar er expedient deth Plan director urbanistic, atau coma ei previst de hèr deman, dia 2 d’octobre. Atau madeish, es amassades s’ampliaràn as diuèrsi sectors sociaus e economics afectadi pes previsions deth Plan.

Eth Conselh Generau d’Aran ei partidari d’arribar as maxims consensi possibles e avalòre fòrça positivament que, per prumèr còp ena istòria, era Generalitat se preocupe per garantir un desvolopament ordenat, economicament eficient, ambientaument sostenible e sociaument just, dempús de decades de descontròtle e de manca de definicion d’estratègies territoriaus integrals.