Per un aute costat, ECA balhe assessorament entara tramitacion, enquiath 27 de mai (dia de venciment des sollicituds), des bèques de desplaçament entà alumnes que corsen cicles formatius dehòra dera Val d’Aran (http://www.joenessa.org/index.php?md=articles&id=1440&lg=ara).
Eth Conselh Generau a ajudat a elaborar es plans locaus de joenessa de Bossòst, Es Bòrdes e era E.M.D. de Bagergue entà facilitar eth prètzhèt des municipis enes sues politiques de dinamizacion juveniles. Era maxima institucion a amiat entà dauant diuèrses collaboracions damb er IES d’Aran per miei dera organizacion d’amassades regulares damb es delegats de corsi e d’activitats qu’incentiven as joeni a participar ena vida publica. En aguest sens, eth Conselh e eth centre educatiu consituiràn enguan eth prumèr Conselh Generau dera Joenessa, qu’a de servir entà ahiscar es joeni e joenes dera Val a conéisher de prumèra man eth foncionament des principaus institucions deth país, en tot simolar es procediments d’amassada de Plens e elevar tanben es sues demanes ara maxima institucion e incidir, atau, enes politiques publiques.
En totau, ECA a atenut 3.500 joeni e joenes pendent er an 2008 sus diuèrsi ahèrs, qu’afècten en especiau ara sua emancipacion e ar accès entar abitatge. En concrèt, s’an duplicat, en passar de 13 a 26, es atencions en encastre dera tramitacion e assessorament enes ajuts entà loguèr e renda d’emancipacion basica. En aguest encastre, eth Govèrn a signat damb era Generalitat un acòrd entà disposar dera Bossa Joena d’Abitatge, que permet integrar Aran en servici que met en contacte, en condicions favorables, es joeni damb es propietaris que vòlen logar-les viuendes.
Era conselhèra Costa a anonciat que Les acuelherà aguest ostiu es casaus d’ostiu de Catalonha, a on se desvoloparàn activitats de léser e espòrt. Atau madeish, a remercat eth besonh de seguir damb es campanhes de prevencion dera salut en contra deth consum de drògues entre es joeni e joenes d’Aran.
Joenessa der Espaci entath Ciutadan a aumentat era sua activitat pendent er an 2008. Joenessa der Espaci entath Ciutadan a aumentat era sua activitat pendent er an 2008.
