Aguestes consistissen enes trabalhs de canalizacion d’aigües e asfaltatge des horats, que desvolopen sies empreses especializades, e era abilitacion especiau d’ua partida pressupostària de 100.000 èuros, que se hig as lèu de 300.000 èuros previsti entà hèr front as despenes de manteniment der hilat de camins forestaus dera Val d’Aran entà 2009.
Gràcies ad aguestes mesures, s’an podut daurir es camins forestaus e d’interès toristic e ramadèr a compdar dera prumèra setmana de junh. Eth conselhèr de Miei Ambient e Pagesia, Francisco Bruna, a destacat que “eth Govèrn a duplicat enguan eth sòn esfòrç en manteniment des camins, sustot en matèria de seguiment e contròtle des intervencions qu’amie entà dauant ena practica totalitat des pistes forestaus”. Cau rebrembar qu’aguestes son plaçades enes montes d’utilitat publica, d’apertienença, per tant, as pòbles d’Aran, ei a díder, as municipis e es pedanies corresponents.
Es trabalhs de manteniment an contunhitat pendent tota era sason d’ostiu entà garantir es accèsi damb es mielhors condicions possibles e previer es afectacions que pòden repercotir contra era conservacion des vies. En aguest sens, eth Govèrn d’Aran e era empresa Forestal Catalana S.A. an arribat a un acòrd entà qu’aguesta entitat pogue resòlver, enes pròplèu dies, es trams que s’an maumetut ena pista de Salient (Vilac) dempús dera sua dubertura en junh.
Amassada damb es entitats locaus
Eth Conselh Generau a previst d’amassar-se aguesta tarde damb er Ajuntament de Vielha e Mijaran e es Entitats Municipaus Descentralizades deth municipi entà abordar eth convèni de collaboracion entre era maxima institucion e aguestes entitats locaus en matèria de patrimòni naturau. Aguest convèni establís qu’eth finançament des òbres de manteniment des camins forestaus se curbís en un 75 % peth Conselh Generau e en 25 % restant per part der Ajuntament o EMD afectades.
A despièch d’açò, eth Conselh a anat aquerint, enes darrèri ans, era responsabilitat d’amiar a tèrme tant es trabalhs de manteniment coma eth finançament lèu complèt des òbres en aguestes infraesctructures de titolaritat locau. Eth conselhèr Bruna a manifestat “eth besonh de definir mielhor era collaboracion entà assegurar que totes es pistes forestaus siguen accessibles” e a volut deishar clara era volentat deth Govèrn entà “intervier regularament enes camins d’interès toristic e ramadèr, en tot garantir un modèl de torisme de qualitat e er accès des ramadèrs entàs airaus de peisheus”.
Pista Varradòs. Pista Varradòs.
