Era conselhèra a explicat que "a despièch der esfòrç pressupostari e dera accion de govèrn que priorize era salut coma politica sociau de prumèr ordre, èm dauant d'un problèma estructurau qu'afècte ar ensem de sistèmes de salut der Estat". "Abantes eth problèma se centraue en trobar ua plaça entath mètge qu'acabaue era carrèra, ara eth problèma ei trobar un mètge entà curbir ua plaça en tot híger er especiau aluenhament d'Aran des principaus punts de decision e servicis", a manifestat.

Totun, Noelia Costa a comunicat qu'eth Govèrn "a artenhut eth compromés deth govèrn catalan entà comprovar era disponibilitat de facultatius en d'auti centres de Catalonha entà trasladar-los entà Aran de forma provisionau damb er objectiu de hèr front de manèra urgent ara situacion pendent es mesi d'ostiu, quan pòt èster mès acusada". En aguest sens, a declarat qu'eth Govèrn "hèr front ara manca de mètges damb tot er esfòrç e trabalh deth qu'ei capable, non s'amague e da era cara per miei deth prumèr titular de Salut damb dedicacion exclusiva ara politica sanitària". Pr'amor d'açò, a profitat entà arregraïr "eth subreesfòrç des professionaus entà alongar eth torn d'atencion as usatgèrs" e "era paciéncia des ciutadans que s'an pogut veir perjudicadi".

Era conselhèra a auançat qu'eth departament de Sanitat e Servicis Sociaus "trabalhe en aguesti moments en d'auti projèctes estrategics entà curbir es mancances deth sistèma de salut aranés per miei des naues tecnologies entà prebotjar era assisténcia medica a distància damb centres de referéncia". Atau madeish, a rebrembat "eth refòrç dera collaboracion qu'eth Departament a establit per miei d'un convèni damb er Institut Català de Salut entà intercambiar prestacions damb es espitaus Arnau de Vilanova de Lleida e eth Vall d'Hebron de Barcelona".

aran Conselhèra de Salut dera Generalitat, Marina Geli, sindic d'Aran Francés Boya e onselhèra de Sanitat e Servicis Sociaus, Noelia Costa.