Era talha de husta presente, ena sua màger part, ua policromia dorada combinada damb tonalitats vermelhes. Segontes era tecnica de Patrimòni deth Conselh Generau, Elisa Ros, se tracte d’ua talha d’estil gotic primitiu e d’ua qualitat artistica fòrça remercable.

Era restauracion s’a amiat a tèrme damb er auspici deth Conselh Generau d’Aran e era concertacion deth Bisbat d’Urgell e era Generalitat de Catalunya. Damb un còst de 5.000 èuros, eth Bisbat a assumit eth 30 % deth finançament, e era inversion deth 70 % restant s’a efectuat per miei d’un convèni entre eth Conselh Generau d’Aran e era Generalitat de Catalunya. Acompanhat deth conselhèr generau d’Arties e Garòs, José Antonio Bruna, eth sindic d’Aran, Francés Boya, s’a felicitat pera restauracion e a hiscat a “seguir damb era recuperacion e metuda en valor deth patrimòni artistic aranés coma forma d’excelléncia nacionau, culturau e toristica”.

Atau madeish, eth Conselh Generau a encomanat era restauracion de tres talhes mès, era de Sant Pèir d’Escunhau, era de Sant Joan Evangeliste d’Aubèrt e era de Sant Agustin d’Arró, qu’an estat trasladades entath Centre de Restauracion dera Generalitat, segontes a informat eth conselhèr José Antonio Bruna. Aguesta actuacion compde damb un pressupòst de 20.000 èuros.

Restauren era talha gotica deth Sant Joan d’Arties. Restauren era talha gotica deth Sant Joan d’Arties.