En totau, era oficina de Torisme a acumulat 15.000 atencions pendent eth mes de junshèga e era prumèra quinzena d’agost, que supòsen un aument de 3.000 persones. Enes casetes d’Aiguamòg e Valarties aurien passat, sonque en mes de junhsèga, mès de 4.500 toristes (mès de 1.400 respècte de 2008). Tanben s’a duplicat eth pas de ciclistes en aguesti dus airaus pendent eth mes de junhsèga, en tot passar de 120, en 2008, a 262, en 2009.

Eth vicesindic 3au e conselhèr de Torisme, Comèrç e Transpòrt, Juan Antonio Serrano, a metut de relèu era “especiau significança” der increment des atencions toristiques “en uns moments de crisi economica qu’afècte a fòrça familhes der Estat”. Ua des rasons possibles qu’a apuntat ei era opcion pes destinacions mès propères. Tanben s’a referit ar “esfòrç” qu’eth Govèrn aranés realize entà promocionar era Val d’Aran coma destinacion de referéncia enes activitats de montanha, coma eth senderisme e era BTT, dera man deth plan entara desestacionalizacion toristica.

Torisme Val d’Aran a començat un programa de promocion d’Aran coma zòna periferica deth Parc Nacionau d’Aigüestòrtes, en tot publicar mès de 40.000 huelhetons especiaus qu’informen clarament sus es accèssi entath Parc a tauèrs de Colomèrs e Valarties e en tot prebotjar eth plaçament de pannèus indicatius deth PN enes entrades d’Arties e Salardú.

Estanh Obago. Estanh Obago.