En referéncia ath servici intèrn deth conjunt deth país, eth Conselh Generau regularize es oraris en tot fixar-ne un madeish entà tot er an, damb petites variacions pendent era tempsada d’iuèrn e es mesi de junhsèga e agost, sasons enes quaus es servicis arribaràn entà Beret. Entà saber-ne es ores de gessuda e arribada, s’an metut a disposicion huelhetons informatius enes parades de bus, ena sedença deth Conselh Generau en Vielha e enes oficines de torisme dera Val d’Aran.

Atau madeish, eth departament qu’entèste Serrano a decidit d’ampliar er orari deth bus nocturn damb gessudes de Baquèira entàs 2.50 e 4.20 ores (e arribades en Les tàs 3.35 e 5.05 ores) e de Les entàs 1.30 e 3.35 ores (e arribades en Baquèira tàs 2.20 e 4.20). Damb aguesta mesura, “s’a volut dar respòsta as demanes des usatgèrs d’aguest bus, qu’a agut ua acuelhuda plan bona”, atau coma a argumentat eth conselhèr.

Eth Conselh Generau met en foncionament un nau servici de transpòrt intèrn entre Casau e Vielha. Eth servici se realizarà de deluns a diuendres damb gessudes de Casau entàs 8.40 e 14.30 ores, e gessudes de Vielha tà Casau entàs 14.10 e 17.20 ores. Eth veïcul aurà dues parades, ua en punt d’interseccion dera carretèra N-230 e er accès entà Casau e era auta ena entrada deth nuclèu, en Sapporo. Eth servici coincidirà damb eth calendari deth cors escolar e s’interrompirà pendent era sason d’ostiu. Eth conselhèr Serrano a explicat qu’eth nau bus entà Casau a coma objetiu “facilitar eth transpòrt escolar entàs familhes deth pòble, mès tanben entara rèsta de vesins o d’auti usatgèrs que se poguen lotjar en Parador de Vielha”.

Juan Antonio Serrano s’a mostrat satisfèt pes naui servicis de transpòrt public “pr’amor que eth transpòrt public d’Aran guanhe en freqüéncia de pas e, ath temps, en tot regularizar es oraris pendent tot er an, apòrte estabilitat entar usatgèr damb era tranquilitat de saber que sonque i aurà ues leugères alteracions enes sasons d’ostiu e iuèrn”. En tot seguir er exemple deth recentament introdusit bus nocturn, a soslinhat qu’eth Govèrn deth Conselh Generau “trabalhe entà ampliar es servicis de transpòrt public ath maximom des possibilitats dera administracion aranesa”. “En aguesta linha, auem daurit eth nau servici de Casau e auem aumentat era frequéncia de pas des busi diürns, atau coma auem alongat eth bus nocturn en veir era bona acuelhuda qu’a agut entre es vesins dera Val”, a declarat.

Eth conselhèr de Torisme, Comèrç e Transpòrt a assegurat qu’es naues mesures “son possibles pr’amor qu’eth Govèrn a pogut aumentar substanciaument eth pressupòst de transpòrt public, en tot passar des 50.000 èuros as 180.000 èuros entar exercici 2008” . “Entath Conselh Generau, eth transpòrt public ei ua prioritat, pr’amor d’açò volem incrementar es servicis d’autobús entà garantir era mobilitat des persones tant entà laguens coma entà dehòra deth país”, a concludit.

Transpòrt public. Transpòrt public.