Ath delà, se projècte un airau de creishement d’activitat economica damb capacitat otelèra, petiti comèrçi e 5 abitatges restacadi damb eth comèrç. Dempús d’aguest pas, er Ajuntament de Les a de seguir era tramitacion der expedient en tot incorporar era memòria ambientau corresponenta. Eth director generau d’Urbanisme, Pere Solà, a assegurat qu’eth projècte “ja compde damb er informe favorable entà usi comerciaus deth Departament d’Innovacion, Universitats e Empresa”.

Urbanisme a dat lum vèrda ar aument dera densitat residenciau de dues parcèlles en pòble de Mont entà bastir 10 abitatges de proteccion oficiau, “sense incrementar, totun, eth tèt admetut”, segontes Solà. Tanben s’a aprovat eth plan especiau entà plaçar un centre de magazenatge e distribucion de Gas Liquat Propan (GLP) en nuclèu d’Escunhau e Casarilh.

Eth sindic d’Aran, Francés Boya, a metut de relèu que “pendent aguest periòde a prevalut era volentat de cooperacion e collaboracion entre eth Conselh Generau d’Aran e eth Departament en test at peth conselhèr Joaquim Nadal”. “Eth Conselh Generau a aumentat era sua participacion tecnica enes ahèrs tractadi ena Comission d’Urbanisme, era quau causa demòstre eth respècte que i a agut pera autonomia d’Aran”, segontes Boya, que s’a hijut as arregraïments manifestadi per alcalde de Naut Aran as dirigents de PTOP pera sua “disponibilitat e actitud resolutiva”.