Era Mòstra, organizada per Torisme Val d’Aran e eth Grèmi d’Ostalaria dera Val d’Aran, a decidit de tornar a unificar per dusau viatge es prètzi des menús, qu’engoan ei de 36 èuros, e d’organizar paquets gastronomics qu’includissen lotjament e activitats de léser coma senderisme (mès informacion en www.torismearan.org). Era passada edicion compdèc damb 1.800 comensaus, atau coma a informat eth vicesindic 3au e conselhèr de Torisme, Comèrç e Transpòrt, Juan Antonio Serrano.

En transcurs dera presentacion, eth sindic d’Aran, Francés Boya, a encoratjat ath sector dera restauracion dera Val d’Aran a “seguir damb eth sòn trabalh inestimable qu’apòrte valor hijut ara destinacion d’Aran coma destinacion de qualitat” e a remercat eth besonh “d’apostar per ua cultura gastronomica de referéncia que hèsque d’Aran un lòc destacable en encastre deth torisme culinari”.

Eth Sindic a profitat entà anonciar qu’eth caviar produsit en Les se promocionarà engoan ena hèira de productes de qualitat e desvolopament sostenible dera Fondacion Príncep Carles d’Anglaterra, e a assegurat qu’eth Govèrn deth Conselh Generau apòste per “possar es productes autoctòns o produsits en país que singularizen era nòsta aufèrta toristica”.