Dauant d'aguesti hèts plan grèus, eth Conselh Generau d'Aran a denonciat as Mòssos d'Esquadra er escampament que, detectat era setmana passada, proven pressumptament dera zòna comerciau de Mijaran, segontes assegure er informe der airau d'explotacion EDARS dera Val d'Aran, deth dia 2 de hereuèr.

Dempús des avaloracions oportunes, eth Govèrn dera maxima institucion a dubèrt diligéncies entà dar curs, amassa damb era Agéncia Catalana dera Aigua (ACA), ara demana de responsabilitats, per miei des sancions corresponentes, que s'an generat ena despena per auer paralizat era depuradora, atau coma pes conseqüéncies mieiambientaus que s'agen pogut provocar en arriu Garona e en entorn naturau.

Enes inspeccions tecniques que s'an realizat en arriu enquia ara, non s'an detectat incidéncies remercables d'afectacion ar ecosistèma fluviau, e es tecnics competents efectuen, en aguesti moments, es peritatges corresponents tà conéisher eth volum reau de gasòl vessat. Mentretant, des deth Departament de Miei Ambient e Pagesia deth Conselh, se priorize era reactivacion, damb era maxima brevetat possibla, deth sistèma de depuracion, que pòt començar a èster operatiu en quinze dies e, ath cent per cent, d'ençà d'un mes.