Aguesta ruta toristica e culturau se poirie efectuar a pè o en coche e permeterie méter en valor es camins tradicionaus e er entorn paisatgistic deth Pirenèu centrau. Eth sindic d’Aran, Francés Boya, a afirmat que “era idèa principau dera propòsta ei dar a conéisher era esséncia der art, en especiau deth Romanic, en contèxte deth Pirenèu”. Boya a destacat era “oportunitat d’apregondir era cooperacion entre es pòbles pirenèncs, per miei d’aguesta propòsta”.

Eth Sindic a precisat qu’aguest ei un projècte “incipient” que trabalhen de forma conjunta eth Conselh Generau, era Communauté de Communes du Haute Comminges, era Comarca de la Ribagorza, er Ajuntament de la Vall de Boí e eth Consell Comarcal de l’Alta Ribagorça, damb era possibilitat d’incorporar tanben ara region deth Coserans, donques eth camin poderie gésser tanben de Sant Lisièr, caplòc d’aguesta region occitana.

Eth projècte contemple ua collaboracion damb eth Musèu Nacionau d’Art de Catalonha (MNAC), que conten fòrça des pèces romaniques deth Pirinèu catalan, entà hèr ua difusion conjunta deth camin e organizar exposicions temporaus des òbres sauvades en musèu, que se mostrarien en sòn contèxte originau.

Eth Conselh estudie era possibilitat d’articular un patronat entre es administracions implicades entà dinamizar eth projècte e era gestion des actuacions que se poguen desvolopar a compdar dera sua metuda en marcha.

SantPèir-Escunhau. SantPèir-Escunhau.