Era vicesindica 2au e conselhèra de Sanitat e Servicis Sociaus, Noelia Costa , a anonciat aué era mesura que “s’emmarque laguens dera cartèra de servicis dera Lei de Servicis Sociaus de 2007 e qu’eth Govèrn d’Aran, a trauèrs deth sòn Plan d’Actuacion Sociau, auie coma objectiu de mielhorar”.

Eth prètz s’a establit en 196,5 èuros ar an per cada usatgèr (abantes calie pagar 290 € / an). Ath delà, es Servicis Sociaus deth Conselh avalòren ua sòrta de requisits establidi per reglament entà qu’es afectadi poguen optar a ua ajuda que subvencione era prestacion, en cas que non poguen hèr front ad aguest pagament. Era conselhèra Costa a soslinhat era “rebaisha substanciau en prètz qu’artenhen es usatgèrs a trauèrs dera mediacion deth Conselh damb era empresa” e l’a justificat tanben peth besonh de “facilitar a toti es usatgèrs er accès entà un des servicis basics de supòrt ara atencion domiciliària, especiaument en aguesti tempsi de crisi economica”.

Actuaument, es Servicis Sociaus an registrat 26 usatgèrs en Aran, numero qu’oscille mesaderament ath torn d’un marge de tres persones per diuèrsi motius, coma eth cambi de domicili o er ingrès ena residéncia. Es servicis de teleassisténcia s’adrecen entàs persones damb un nivèu d’autonomia limitat e damb dependéncia, per mor dera edat o er estat fisic, damb pro capacitat entara utilizacion corrècta deth servici, que viuen soletes o damb persones que non pòden atier-les de forma contunhada e sufisenta.

Sedença servicis sociaus. Sedença servicis sociaus.