Entre aguesti ahèrs, s’a destacat eth besonh de bastir ua residéncia geriatrica coma centre de dia, dera quau eth Conselh Generau dejà a assomit era redaccion deth projècte, e de dinamizar eth torisme de Quate Lòcs per miei deth Parc de Visualizacion dera Fauna deth Portilhon, actuament ena sua 6au fasa.

Ena amassada, eth sindic d’Aran, Francés Boya, a anonciat qu’eth Conselh Generau convocarà a toti es ajuntaments deth país entà crear ua comission entà avalorar eth nau traçat dera carretèra N-230 ath sòn pas per Aran un còp eth ministèri de Foment presente era sua prepausa, que descarte eth bastiment d’ua autovia peth fòrt impacte visuau e mieiambientau. Segontes Boya, era volentat deth Conselh ei arténher un consens en territòri a compdar der assessorament tecnic corresponent a favor dera melhor opcion possibla damb era finalitat d’evitar eth destorbament viau ena vida vidanta des vilatges afectadi peth pas dera N-230.

Acompanhat des alcaldes de Bossòst e Les, Paco Rodríguez Miranda e Emilio Medan, respectivament, atau coma deth conselhèr generau de Quate Lòcs, Hipólito Cruces , e deth vocau de Bausen, José Antonio Barés, eth Sindic a significat eth “fèrm compromés deth govèrn deth Conselh entà balhar supòrt as Ajuntaments en ua relacion de collaboracion e non pas de confrontacion ne de competéncia”.

Imatge del plenari. Una imatge del plenari.