Es processons de Diuendres Sant (Via Crucis e Sant Enterrament) incorpòren enguan eth nau pas deth Jesús dera Esperança, ua talha de husta policromada qu’a estat elaborada peth talhèr der artista Miguel Hernández de Sevilla. Aguest pas amplie es processons centenàries de Bossòst, es uniques que se consèrven en tota era Val d’Aran.

Eth nau pas, encomanat pera Associacion de Setmana Santa damb eth supòrt der Ajuntament de Bossòst, s’a estat gestant pendent es darrèri ans e veirà era lum era pròplèu setmana. Era imatge (un Jesucrist natzarèn: damb creu e tunica morada longa) serà portada per diuèrsi natzarèns per miei d’ua plataforma de husta, qu’a premanit entara ocasion er hustèr Carlos Rella, de Çò de Oelhèra de Bossòst.

Mès de 200 vesins preneràn part des processons d’aguest an. Cau rebrembar qu’eth Dimenge de Pasca a lòc tanben eth Sant Retrobament, que, d’ençà d’uns ans, compde damb ua naua figura deth Jesús Ressuscitat.

Er alcalde Francisco Rodríguez Miranda a felicitat ara associacion per “esfòrç contunhat” entà arténher aguest nau pas, que “darà mès projeccion e relevància a ua processon fòrça avalorada pes vesins de Bossòst, Aran e es der entorn deth parçan de Comènge”. Er Ajuntament se propòse promocionar mès es processons com un des eveniments de mès interès e qu’autrege identitat ath pòble de Bossòst.

ACTES SETMANA SANTA BOSSÒST 2012

Dissabte 31 de març: Missa de Presentacion e Benediccion dera Imatge deth Jesús o Crist dera Esperança de Bossòst, tàs 20h00

Diuendres Sant, 6 d’abriu: Processons de Via Crucis tàs 10h00, e Sant Enterrament tàs 22h30