Er Ajuntament de Bossòst a previst mielhorar e reformar er accès ara plaça dera Glèisa, d’ençà dera confluéncia des carrèrs Major e Pietat. Es òbres començaràn eth pròplèu dimèrcles, dia 21 de seteme. Atau ac a anonciat aué er Alcalde Francisco Rodríguez Miranda, qu’a assegurat qu’era intervencion durarà, apruprètz, dus mesi. Mentretant, se barrarà eth pas as veïculs per rasons de seguretat.
 
Aguesta actuacion a estat adjudicada ara empresa ANPEMA 2011 S.L. per un impòrt de lèu 70.000 èuros, que serà subvencionat peth Departament de Territòri e Sostenibilitat dera Generalitat de Catalonha.
 
Francisco Rodríguez a afirmat qu’era òbra “consistirà en un cambi de paviment per pèira de granit entà dignificar er espaci e facilitar eth transit des passants, sustot dera gent grana o des persones damb mobilitat redusida, ja qu’er actuau solèr ei hèt damb pèires fòrça granes e subergessentes que dificulten tot soent era accessibilitat”.
 
“Ath delà, se reauçarà era pòrta d’entrada ath centre istoric e, especiaument, ara glèisa dera Purificacion dera Mair de Diu, un des maximaus exponents der art romanic en Aran”, segontes er Alcalde.