Atau ac a decidit aué eth Govèrn aranés, dempús d’auer hèt un balanç dera recuelhuda de lordères pendent eth passat pònt dera Constitucion e era Immaculada.

Eth cap de Coordinacion des Servicis Publics, Emilio Sanllehy, a manifestat que “eth Govèrn non ei satisfèt damb era prestacion deth servici en aguest pònt, perque s’a aumentat de forma considerabla eth volum de residus respècte der an 2009, ath torn d’un 30 %, segontes es prumèri calculs; fòrça veïculs mau estacionadi an impedit eth pas des camions entà hèr era remassada; e s’a agut de hèr front, per prumèr còp, ara recuelhuda dera lordèra acumulada enes contenedors sosterradi”, qu’es ajuntaments an plaçat en Vielha e Salardú.

En cas de Vielha, aguesti contenedors an estat plaçadi en ua zòna damb ua fòrta pression toristica en dies de maxima afluéncia. Aguesta pression s’a vist acusada pes caracteristiques fisiques des naui recipients, que provòquen er esbauç dera lordèra.

Entath Govèrn aranés, s’a metut de relèu qu’ei de besonh mès collaboracion per part des ajuntaments, coma responsables des punts de recuelhuda. Per aguest motiu, convocarà enes pròplèu dies ua amassada damb es alcaldes damb er objectiu d’incenvitar era sua collaboracion ena prestacion corrècta d’aguest servici public.

Ath delà deth supòrt des Mossos d’Esquadra, eth Conselh Generau estudie era possibilitat de cambiar es oraris de recuelhuda, crear linhes especifiques entàs sosterradi o ben arrefortir era plantilha de personau damb er objectiu de seguir mielhorant eth servici.