Eth conselhèr de Torisme, Comèrç e Transpòrt, Juan Antonio Serrano, a afirmat que “ei de besonh de dotar-mos d’un organ de participacion entara consulta, estudi, assessorament e coneishement d’Aran en àmbit dera economia e era empresa, perque mos cau un teishit empresariau e ua societat civil fòrts e tanben ua administracion publica mès dubèrta e agila”.

Aguest Conselh, qu’aurà d’èster aprovat peth plen deth Conselh, s’a dat a conéisher en marc d’un acte qu’a agut lòc en Parador de Vielha e a on a assistit un centenat de representants deth sector dera economia e era empresa dera Val d’Aran. En aguesta presentacion, i an participat eth sindic d’Aran, Francés Boya, eth conselhèr d’Economia e Finances dera Generalitat, Antoni Castells, eth vicesindic 1èr e conselhèr d’Administracion Publica e Finances, Rufino Martínez , e eth conselhèr Serrano.

Antoni Castells, qu’a estat recebut peth plenari deth Conselh ena Casa deth Senhor d’Arròs, a assegurat, en transcurs dera sua intervencion, que Catalonha ei en trèn de gésser dera recession economica, pr’amor que “ja s’a tocat hons”. Castells a remercat que, entà superar era crisi, cau “contier era despena e prebotjar era productivitat”, pr’amor que sonque atau era economia serà mès competitiva.

Eth sindic e eth conselhèr Martínez an destacat era collaboracion amiada a tèrme entre eth Govèrn d’Aran e eth Departament d’Economia e Finances, qu’a permetut signar un convèni entath desvolopament e adequacion des equipaments publics per miei d’un pressupòst qu’ascendís a lèu 5 milions d’èuros. Aguesta inversion permeterà desplegar er autogovèrn e generar lòcs de trabalh, “a favor d’ua economia productiva”, segontes Martínez.

Francés Boya a advocat per impulsar era “innovacion” ena economia aranesa per miei de projèctes coma eth Centre d’Innovacion Empresariau e Tecnologica, que desvolope eth Govèrn aranés en Casau coma “un esturment de país ath servici des joeni e es naui emprenedors”.

Castells e Boya. Castells e Boya.