“Era prioritat deth Sindic ei era seguretat des persones, e non era reintroduccion des ossi en Pirenèu dempús dera sua reintroduccion” en 1996, atau coma a proclamat.

Pr’amor d’açò, Francés Boya a advocat per capturar era ossa Hvala, retirar era rèsta d’ossi e abilitar mecanismes de seguiment e contròtle per part des autoritats enquiara sua retirada complèta. En aguest sens, a emplaçat ara administracion francesa entà amiar era reintroduccion “en ua zòna a on non i age persones e arrés non se pogue hèr mau”. Boya a argumentat qu’era “preséncia der òme enes montanhes ei abituau”. Totun, “Aran e eth Pirenèu non son pas era sabana africana, son un territòri plan umanizat, a on eth contacte des persones damb eth miei ambient ei fòrça dirècte”, a assegurat. “Non podem perméter qu’era gent deth territòri e es persones que son enes montanhes agen pòur d’èster atacadi per os”, atau coma a soslinhat.

Damb aguest propòsit, eth Sindic s’a amassat aué madeish damb eth president dera Generalitat, José Montilla, entà comunicar era sua decision e a mantengut tanben ua trobada damb eth conselhèr de Miei Ambient e Abitatge, Francesc Baltasar, entà demanar-li supòrt. Era prepausa deth Sindic a estat ben acuelhuda peth Govèrn catalan. Atau madeish, Francés Boya despacharà damb eth Ministèri de Miei Ambient enes pròplèu dies entà sollicitar era retirada des ossi. Totun, a profitat entà anonciar que presentarà ena session plenària deth pròplèu dimars ua mocion en aguesta direccion en nòm deth Govèrn aranés e deth grop que represente, Unitat d’Aran.

Era agression a agut lòc quan era ossa Hvala, frut dera darrèra reintroduccion de 2006, a atacat a un caçaire que hège batuda ena zòna de Portet, en Les. Eth caçaire, qu’anaue acompanhat deth sòn can, s’a vist sorprenut per os damb posicion menaçadora, quan aguest a emetut un crit entà espantar-le. Mès, luenh d’artenhe’c, er os s'i a balançat en tot esgarrapar-li eth braç e mossegar-li era cama. Eth vesin de Les a pogut arturar era agression en tot disparar en aire, causa qu’a permetut era retirada dera ossa. Atau, a pogut desplaçar-se damb era rèsta deth grop de caçaires e dempús a estat trasladat damb ambulància entar Espitau de Vielha, a on se li a balhat era nauta a prumèra ora dera tarde damb sèt punts en cada extremitat.

Es guardes de Miei Ambient deth Conselh Generau s’an personat en lòc des hèts e an pogut constatar que se tractaue dera ossa Hvala. Er exemplar pòrte un emissor intraabdominau que transmitís ua cobertura menor ara que pòt efectuar un colièr detector. Totun, eth grop de seguiment auie trabalhat sus eth terrèn a prumèra ora deth maitin e alavetz non auien recebut cap tipe de senhau qu’indiquèsse dera preséncia der os.

El síndic d'Aran, Francesc Boya. El síndic d'Aran, Francesc Boya.