Damb aguest tèxte, eth Plen solemnize era volentat deth Conselh Generau entà qu’Aran demore “ath marge” dera vegueria de Naut Pirenèu e reclame establir “ua relacion dirècta, de govèrn a govèrn, damb era Generalitat de Catalonha en tot esvitar quinsevolh intermediacion administrativa”.

Era declaracion ven motivada peth procès de redefinicion dera organizacion territoriau e administrativa qu’a encetat eth departament de Governacion e Administracions Publiques deth govèrn catalan pendent es darrèri mesi. Dauant d’açò, eth sindic d’Aran, Francés Boya, e en representacion deth grop d’Unitat d’Aran (UA), a adreçat entath Plen ua declaracion conjunta qu’a estat consensuada damb Convergéncia Democratica Aranesa (CDA) e eth Partit Renovador d’Arties e Garòs (PRAG).

Per un aute costat, eth Plen a dat lum vèrda ara modificacion deth pressupòst generau damb eth vòt favorable d’UA e PRAG e era abstencion de CDA, en tot híger un aument de 875.500 èuros. Eth 64 % der impòrt se destine entà naua inversion e era rèsta entà despenes de Torisme Juvenil dera Val d’Aran (TOJUVA), Cultura e Servicis Publics (lordères).

D’aguesta forma, eth Govèrn invertirà 220.000 èuros (25 %) en vies de comunicacion, accèssi e pistes, e 144.000 (16 %) èuros entà torisme e promocion economica damb er objectiu de reorganizar e dinamizar es lòcs mès emblematics dera Val d’Aran. Atau madeish, era modificacion deth pressupòst permeterà qu’eth Conselh Generau dedique 150.000 èuros (17 %) entar airau de Sanitat damb era finalitat d’aquerir ua naua ambulància.

Eth Plen deth Conselh Generau d’Aran. Eth Plen deth Conselh Generau d’Aran.