D’aguesta forma, er Alcalde Francisco Rodríguez Miranda ei tanben titolar d’Urbanisme, Comèrç, Torisme, Seguretat Ciutadana, Proteccion Civiu, Accion Sociau e Gent Grana.

Amador Marqués deven Tinent d’Alcalde e còsso d’Isenda, Comèrç, Torisme, Cultura, Ensenhament, Naues Tecnologies e Hèstes. Maria Ángeles Medan serà era còsso de Pagesia, Bòsqui, Miei Ambient, Servicis Municipaus e Brigada d’Òbres, Recorsi Umans e Gestion dera Zòna Esportiva.
 
Eth còsso Alex Peiró assomís Espòrts, Joenessa e Hèstes, e Emilio José Fernando serà responsable d’Urbanisme, Òbres, Via Publica e Sanitat. Er Alcalde a destacat que “eth nau Govèrn ei un equip que trabalharà de forma conjunta e que, per açò, compartís quauques cartères entà cercar era implicacion de toti es airaus e aufrir major proximitat e eficàcia des ahèrs que preocupen as vesins e vesies de Bossòst”.
 
D’un aute costat, Francisco Rodríguez Miranda a renonciat ath sòn sòu public, e eth Tinent d’Alcalde aurà dedicacion exclusiva, que serà subvencionada ena sua màger part peth Departament de Governacion e Relacions Institucionaus dera Generalitat, d’acòrd damb es ajudes qu’era conselheria autrege a cargues elèctes locaus de municipis d’enquia 2.000 abitants, com ei eth cas de Bossòst.
 
Eth Plen a aprovat eth nomenament deth nau tresorèr, que serà Marqués, e a balhat compde dera designacion des pòrtavotz des grops politics: Francisco Rodríguez Miranda (titolar) e Amador Marqués (suplent), per Unitat d’Aran-PM-PSC; e Eduardo Valdecantos (titolar) e Maria Jesús Safont (suplenta), per CDA-PNA.
 
D’un aute costat, er Ajuntament a proposat renauir eth nomenament de Miguel Milanés coma Jutge de Patz titolar, e establir es hèstes locaus der an 2012 (Sant Antòni, 13 de junh; e Sant Ròc, 16 d’agost).