Totun, s’a podut constatar qu’aumens era scèna deth sègle XVI, d’estil renaishentista, “descriurie a Diu Pair acompanhat d’un tetramòrf damb es evangelistes representadi”, segontes era tecnica de Patrimòni deth Govèrn aranés, Elisa Ros. Eth significat des fragments dera auta scèna, consideradi romanics, ei mès dificil de determinar. Es pintures an estat consolidades e seràn objècte, enes pròplèu campanhes, d’un trebalh mès apregondit de restauracion e conservacion.

Eth Conselh Generau, qu’a destinat 14.000 èuros entad aguesta actuacion, desvolope, en aguesti moments, un projècte entà dar a conéisher e explicar as visitaires eth conjunt des scènes pictoriques de naut valor artistic e istoric qu’acuelh era glèisa. Segontes Ros, “era descubèrta exemplifique es dus moments d’esplendor que viu eth temple, tant en sègle XII coma a finaus deth XV e principis deth XVI”.

Dera sua part, eth conselhèr José Antonio Bruna a explicat que “eth Govèrn aranés vò méter en valor era excepcionalitat d’aguestes pintures en ensem deth Pirenèu e Catalonha, perque Unha ei ua des pògues glèises deth territòri que consèrve in situ pintures romaniques e renaishentistes”.

Cau rebrembar qu’en 2009 sigueren trobades ues pintures deth sègle XVI fòrça remercables tant pera sua qualitat coma pera sua excepcionalitat, donques se tracte des sèt virtuts teologaus e cardinaus, representades en estil classic per personatges femenins. En 1995, se descurbic tanben un aute conjunt de pintures muraus romaniques, de plan bona factura e es uniques sauvades en parçan.

Pintures muraus. Pintures muraus.