Era session d’aué, realizada ena sedença deth Conselh en Vielha, tracte era creacion de productes toristics de senderisme coma ua oportunitat estrategica e es experiéncies ena creacion, promocion e comercializacion de productes de senderisme.
Eth sindic d’Aran, Francés Boya, qu’a inaugurat era jornada amassa damb eth director der IDAPA, Arcadi Castilló, s’a referit ara apòsta deth Govèrn d’Aran per hèr deth senderisme “un des pilars fonamentaus entà arténher era desestacionalizacion e reactivacion deth torisme aranés e potenciar Aran coma destinacion de montanha”. Entath Govèrn, aguest impuls complementarie era ofèrta toristica aranesa, centrada aué ena activitat que se genère ar entorn dera nhèu. Francés Boya a explicat qu’eth Conselh Generau dispòse d’ua “huelha de ruta”, mercada per un plan especific elaborat damb eth supòrt de Turespaña, entà definir ua estratègia d’impuls des activitats relacionades damb era natura, coma eth senderisme, era BTT e era benestança en montanha.
Eth Conselh Generau a constituït, en mes de març, ua comission de senderisme amassa damb representants des empreses deth torisme d’espòrts, léser e montanha, atau coma damb tecnics toristics e de montanha dera maxima institucion. Era comission permet coordinar es accions comunes qu’en aguest sens se pòden amiar entà dauant, en tot començar pera elaboracion d’un plan estrategic deth senderisme. Segontes eth Govèrn, ei de besonh “predisposar ath sector entà aplicar amassa un nau modèl toristic que emfatize es productes de montanha, pr’amor qu’Aran ne pòt aufrir diuèrsi e de nauta qualitat pes condicions excepcionaus de natura, servicis e infraestructures”.
Era maxima institucion a previst de crear un punt de trobada deth senderista e intervier enes camins e rutes que se definisquen en si dera comission. D’aguesta forma, se vò balhar supòrt as inciatives que permeten crear naui productes de montanha e consolidar-ne es dejà existenti.
Aran acuelh es prumères jornades de senderisme en Pirenèu. Aran acuelh es prumères jornades de senderisme en Pirenèu.
