Per un aute costat, eth sindic d’Aran, Francés Boya, a anonciat qu’eth Govèrn d’Aran a arribat a un acòrd damb era Generalitat entà elaborar un projècte especific de mielhora dera C-28 entre Salardú e Vaquèira, que poderie executar-se a compdar dera primauèra de 2010.

Era collaboracion entre eth Conselh e er Ajuntament a permetut de condicionar era totalitat de camins forestaus de Naut Aran, a on s’i concentre ua grana part des accèssi entàs paratges mès visitadi deth país. Eth finançament des mielhores complís atau damb eth convèni entre es administracions, peth quau eth Conselh assomís eth 75 % deth còst e er Ajuntament, era rèsta. Era inversion totau de 2008 ascendic a 80.000 èuros, segontes a informat eth conselhèr de Miei Ambient e Pagesia, Francés Bruna.

Era mielhora dera C-28 afècte ath terçon d’Arties e Garòs, a causa dera grana afluéncia de toristes qu’en iuèrn utilizen era via entà accedir entàs pistes de Vaquèira. Segontes eth Sindic, eth Departament de Politica Territoriau e Òbres Publiques a prenut eth compromís de segregar deth projècte globau dera C-28 eth projècte de mielhora deth tram Salardú – Vaquèira, atenut eth sòn estat de deteriorament. Aguest acòrd permeterie auançar era execucion des òbres, que poderien desvolopar-se a compdar de 2010.

Amassada. Amassada.