Ena prumèra amassada qu’an mantengut andús representants, eth Sindic e Brugué an volut méter es bases entà amiar un projècte globau de participacion civica en es encastres economic, de coesion sociau, d’administracion e servicis publics, atau coma un d’especific dedicat ath procès d’elaboracion dera reforma dera Lei d’Aran. Segontes eth Sindic, eth marc de collaboracion se poderie concretar per miei d’un convèni enter andues administracions.

Joaquim Brugué a explicat qu’abantes d’engegar eth procès serà de besonh d’elaborar ua mapa d’entorn entà hèr un diagnostic dera situacion. Eth pas següent consistirà en daurir un debat generic a trauèrs de fòrums, talhèrs, trobades bilateraus, enquèstes o en tot daurir ua plana wèb interactiva.

Fin finau, s’establirà un calendari d’actuacions concrètes qu’incidisquen ena elaboracion des politiques pròpries de forma transversau. “Er objectiu finau ei bastir ua idèa de país compartida per toti, hèta a compdar der ensem dera ciutadania”, a declarat Francés Boya, entà qui “tota era ciutadania a d’auer era possibilitat de participar publicament”, pr’amor que “se non i a ua reflexion compartida, determinadi servicis publics non foncionaràn pas”. Boya a remercat que “se tracte d’endreçar eth procès mejançant era collaboracion dera Generalitat entà que prevalguen en autogovèrn aranés es principis dera participacion e era transparéncia”.

El síndic d'Aran, Paco Boya, amb Joaquim Bruguer. El síndic d'Aran, Paco Boya, amb Joaquim Bruguer.