Es ajudes se concedissen entara mobilitat territoriau, entenuda coma desplaçament e lotjament dehòra d’Aran a on s’a era residéncia. Ne pòden èster beneficiaris es estudiants que complisquen es requisits que seguissen:

1. Auer era nacionalitat espanhòla o de bèth estat membre dera Union Europèa. En cas des estudiants estrangèrs non comunitaris an d’acreditar era sua condicion de residents.

2. Demorar en Aran (o Alt Urgell, Alta Ribagorça, Cerdanya, Pallars Jussà, Pallars Sobirà e Solsonès), coma minim des der 1 de gèr de 2005. Excepcionaument s’acceptarà er empadronament posterior ad aguesta data, tostemp qu’era persona sollicitanta acredite tot a fèt era residéncia en ua des set comarques.

Requisits academics:

1. Èster matriculat en ua universitat catalana (cors 2008-2009).

2. Èster matriculat en uns estudis que s’impartisquen de manèra presenciau.

3. Èster matriculat d’un minim de 55 crèdits, en cas de matricula per cors complèt, o de 27,5 crèdits, enes cassi de matricula semestrau. En cas de matricular-se d’un nombre inferior de crèdits, s’a d’aportar ua acreditacion deth centre que justifique que s’a matriculat deth nombre màger de crèdits.

4. Auer despassat eth 80% des crèdits matriculadi en cors anterior o deth darrèr cors corsat en ensenhaments non-tecnics e eth 60%, en cas des ensenhaments tecnics (sonque en cas des persones sollicitantes que non inícien per prumèr còp estudis universitaris eth cors 2008-2009).

5. Demoren excludits d’aguesta convocatòria es persones qu’agen bèra titulacion universitària superiora.

Requisits economics:

1. Cau non depassar pas es limits de renda familhara disponibla e de patrimòni establidi.

2. Er impòrt maximon entà cada ajuda serà de 2.000 èuros.

Entà que cap de joen dera Val d’Aran se quede sense poder participar en aguesta convocatòria, eth Conselh Generau d’Aran facilite era tramitacion dera documentacion d’aguesta linha d’ajudes, en tot adreçar-se tar ECA, ena oficina de Joenessa, plaçada enes baishi deth Palai de Gèu, en orari d’atencion ath public: deluns, dimèrcles e diuendres de 10:00 a 15:00 ores, dimars e dijaus de 10:00 a 13:00 e de 15:00 a 18:00 ores. Eth tèrme entà presentar es sollicituds serà enquiath pròplèu dia 30 de gèr de 2009.

Entà mès informacion se pòt consultar: www.joenessa.org o era resolucion en Diari Oficiau dera Generalitat (www.gencat.net/diari/5288/08346034.htm).