Eth Conselh Generau d’Aran a arrefortit eth dispositiu entà prestar eth servici de recuelhuda de lordères pendent aguestes hèstes de Nadau e Cap d’An. A demana deth Conselh, es Mossos d’Esquadra susvelharàn es coches mau aparcadi e qu’impedissen era recuelhuda enes punts abilitadi, en tot avisar as sòns propietaris e, en sòn cas, enviar era grua entà efecturar era retirada deth veïcul.
 
Eth Conselh refortís eth servici de recuelhuda de lordères.

 Eth Govèrn aranés a abilitat un numero de telefon entà atier es incidéncies que se poguen produsir. Aguest telefon ei eth 973 64 31 50. Tanben a artenhut des ajuntaments que se senhalizen es airaus d’arremassada. S’an trasladat es contenedors des punts mès conflictius entà airaus de mielhor accès.

Ath delà, eth servici de recuelhuda començarà entàs 5.00 ores, en tot auançar ua ora er orari abituau. Enes dies de mès afluéncia, s’abilitarà ua tresau linha que dongue supòrt ara recuelhuda.

Eth cap de Coordinacion des Servicis Publics, Emilio Sanllehy, qu’a mantengut trobades aguesta setmana damb es Mossos e era Brigada Municipau de Vielha – Mijaran, a arregraït era collaboracion des vesins, es autoritats de transit e es ajuntaments entà aufrir eth mielhor servici as ciutadans. Sanllehy demore qu’era arremassada se pogue efectuar damb normalitat.

En aguest sens, eth Conselh a hèt a arribar ua carta d’informacion as vesins de Vielha – Mijaran e Naut Aran, es municipis damb mès afluéncia de toristes, entà préner consciéncia deth besonh de collaborar a mantier un entorn suenhat e hèr dera imatge toristica un vertadèr reflèx dera realitat admirada dera Val d’Aran.