Entad aguest prètzhèt, considère que “eth papèr deth caplòc, Vielha” ei fonamentau per mor deth sòn dinamisme entà arténher fin finau “ua economia competitiva”.

Francés Boya a rebrembat qu’eth Conselh Generau trabalhe entà ajudar as naui empresaris e joeni emprenedors en tot projectar un Vivèr d’Empreses, que compdarà damb eth supòrt deth Parc Scientific e Tecnologic Agroalimentari de Lleida. Preguntat per impacte economic deth complèxe dera Val de Ruda entath torisme deth país, a profitat entà anonciar qu’eth Govèrn d’Aran estudiarà era metuda en marcha d’un plan de chòc entàs petiti empresaris deth sector, pr’amor que “cau superar era etapa” des granes infraestructures otelères e residenciaus, e a metut coma exemple eth convèni de collaboracion damb eth Govèrn d’Espanha, per miei dera agéncia Turespaña, entà prebotjar un plan estrategic de desestacionalizacion e diversificacion dera economia damb ua inversion iniciau de 750.000 èuros.

Per un aute costat, eth Conselh Generau pòrte invertidi 2,5 milions d’èuros en terçon de Castièro d’ençà deth començament dera legislatura, “en tot resòlver ahèrs qu’auien demorat pendents en fòrça ans”, en çò que tanh as prioritats dera maxima institucion, atau coma a declarat eth sindic Boya.

En tot hèr balanç dera accion de govèrn en Castièro, eth Sindic a assegurat que “ena educacion, eth Conselh Generau non serà un convidat de pèira, pr’amor que non sonque apòste pera melhora des infraestructures e equipaments educatius, senon qu’ei disposat a melhorar era qualitat e es esturments educatius” de centres coma er IES d’Aran, plaçat en Vielha. En aguest sens, eth departament de Cultura e Politica Lingüistica deth Conselh Generau a elaborat un projècte educatiu entàs pròplèu ans que cerque eth compromés entre alumnes, pares, professors e institucions damb era finalitat de melhorar era formacion e combàter er absentisme escolar.

En apartat d’infraestructures, eth sindic Francés Boya a tornat a reclamar ath Ministèri de Foment qu’era adjudicacion dera melhora dera N-230 deth tunèl de Vielha enquiara vila “se hèsque de manèra immediata, pr’amor qu’eth projècte ja ei acabat”. Atau madeish, er alcalde de Vielha e Mijaran, José Calbetó, qu’a persutat en que se tengue en compde era “capitalitat” de Vielha, a demanat qu’eth Conselh Generau “s’implique mès damb er Ajuntament entà amiar amassa accions de pression politica”.

Conselh de Terçon de Castièro. El Conselh de Terçon de Castièro.