En acte dera signatura der acòrd tanben i an assistit era directora generau de Prevencion, Escandiment de Huecs e Sauvament, Olga Lanau, eth director generau de Pompièrs e Proteccion Civil deth Conselh Generau, Joan Canalias, eth sosdirector generau operatiu, Antoni Rifà, e eth cap dera division de grops especiaus, Sebastià Massagué. Eth nau acòrd establís, entre d’autes, qu’es servicis de sauvaments e escandiment de huecs en territòri dera Val d’Aran se gestionaràn dirèctament peth Conselh Generau d’Aran.

Dempús dera collaboracion començada per totes dues parts, d’ençà dera Lei 16/1990, de 13 de junhsèga, er objectiu d’aguest nau acòrd qu’ei, d’un costat auançar en desvolopament pròpri des servicis de sauvament e escandiment de huecs dera Val d’Aran e, der aute, establir es mecanismes de coordinacion des Pompièrs d’Aran e era Direccion Generau de Prevencion, Escandiment de Huecs e Sauvaments d’acòrd damb eth marc normatiu establit pera lei reguladora des servicis de prevencion, escandiment de huecs e sauvaments de Catalonha e des previsions der Estatut d’Autonomia de Catalunya.

Era citada Lei 16/1990, de 13 de junhsèga, determinèc qu’era Generalitat de Catalonha auie de cedir ath Conselh Generau d’Aran es competéncies e servicis sus sauvaments e escandiment de huecs. Eth nau acòrd que s’a signat aué establís qu’en marc concrèt dera estructura dera Direccion Generau de Prevencion, Escandiment de Huecs e Sauvaments, era Val d’Aran serà considerada ua unitat foncionau de caractèr especific adscrita ara direccion generau que se coordinarà mejançant es mecanismes establits per andús govèrns.

De un aute costat, en marc dera lei reguladora des servicis de prevencion, escandiment de huecs e sauvaments de Catalonha, es persones que compòsen era estructura d’escandiment de huecs e sauvaments dera Val d’Aran, consideradi pròpriament “ Pompièrs ”, auràn d’èster pompièrs volontaris de Catalonha e, en conseqüéncia, auràn d’acreditar era formacion e era seleccion determinada per ensem de pompièrs volontaris.

Sus eth finançament, eth Conselh Generau d’Aran receberà en 2009 ua soma globau de 1.236.674,31 euros entà prestar eth servici d’escandiment de huecs e sauvaments a cargue des pressupòsti dera Direccion Generau de Prevencion, Escandiment de Huecs e Sauvaments (DGPEIS). Eth Conselh Generau se harà cargue de totes es despenes associades ara prestacion deth servici d’escandiment de huecs e sauvament, exceptat es que corresponguen ara crompa o arrendament des veïculs e equipament de proteccion individuau, e es assegurances des veïculs.

Era dotacion actuau de Pompièrs dera Val d’Aran ei distribuïda en tres parcs de Pompièrs . Pr’amor deth nombre de Pompièrs deth parc de Vielha e des dimensions actuaus deth parc, cau hèr mès granes aguestes installacions. Segon es critèris generaus dera DGPEIS, aguest parc aurie d’auer, en totau, 1.050 mètres carrats, e entà poder-lo hèr mès gran, s’acòrde qu’eth Conselh Generau d’Aran receberà un finançament complementari.

Fin finau, damb er objectiu de garantir eth corrècte desvolopament e aplicacion d’aguest acòrd se constituís ua Comission de seguiment composada de dus representants deth Conselh Generau d’Aran e dus dera Direccion Generau de Prevencion, Escandiment de Huecs e Sauvaments. Aguesta comission s’amassarà aumens un viatge ar an, pendent eth darrèr trimèstre naturau der an.

Un moment de la signatura del conveni. Un moment de la signatura del conveni.