En aguesti moments, es interessadi e es propietaris des terrèns (Societat de Caça e Pesca, Ajuntament e EMDs) prenen acòrds plenaris entà adreçar era instància ath Conselh, que l’a de perméter d’engegar eth procès. Eth Govèrn aranés emeterà un informe tecnic que justifique era finalitat dera modificacion.

Eth Conselh considère qu’aguesta conversion non afectarà, en cap de cas, era proteccion entara quau siguec creada era figura dera Resèrva, perque aguesta a coma finalitat promòir, conservar, fomentar e protegir determinades espècies que o ben ja son protegides en generau, coma er os e eth paom, o ben patissen suberpopulacion, coma eth sanglièr.

Totun, existís eth precedent dera modificacion dera RNC dera Cerdanya, en an 1985. Alavetz, es municipis de Meranges e Bescaran reclamauen era segregacion dera Resèrva qu’entoraue es nuclèus urbans.

Es RNC son espacis declarats per Estat a compdar des ans 60 damb era finalitat de protegir quauques espècies, e damb aguesta finalitat, endreçar eth profitament cinegetic dera zòna. A compdar de 1979, damb era aprobacion der Estatut, s’inicie eth procès de traspàs dera regulacion e gestion ara Generalitat en matèria de conservacion de natura. E dejà enes ans 90, eth Conselh assomís era gestion mieiambientau.

Eth conselhèr Francés Bruna a explicat que “damb aguesta iniciativa, eth Conselh sage de liberar era Resèrva en considerar qu’un cambi de règim non afècte pas ara proteccion mieiambientau e que, ath delà, apòrte un estauvi administratiu respècte des despenes de susvelhança personalizada a qué obligue un espaci d’aguestes caracteristiques”.

El Conselh vò liberar era Resèrva Nacionau de Caça de Naut Aran. El Conselh vò liberar era Resèrva Nacionau de Caça de Naut Aran.