Atau ac a auançat aué eth conselhèr generau José Antonio Bruna , entà qui “eth Govèrn d’Aran a era responsabilitat de susvelhar peth patrimòni mès caracteristic de toti es aranesi e que mielhor represente as nòsti pòbles”, en referéncia as campanaus, que son es elements arquitectonics mès visibles.

Ath delà, eth Conselh Generau ei a punt de concludir es òbres de restauracion deth campanau dera glèisa de Sant Fèlix de Vilac. Aguesti trabalhs an per finalitat daurir ath public era tor gotica, en tot devier eth prumèr campanau de tota era Val que poderà èster visitat.

Era actuacion, que consistís en assolidar e adequar era estructura e es sòns elements (escales, campanes, relòtge e paret), aurà suposat ua inversion de 185.000 èuros.

Dera sua part, eth sindic Francés Boya a anonciat qu’eth Conselh a previst desvolopar ua dusau fasa entà renauir tanben eth losat deth campanau. Boya a assegurat qu’eth projècte “ajudarà a dinamizar eth pòble e eth terçon de Marcatosa”. “Eth Conselh meterà en valor un des campanaus mès emblematics tant peth sòn valor artistic, coma peth sòn plaçament en un entorn naturau damb vistes excepcionaus”, segontes a dit.

Eth campanau de Vilac ei ua mòstra subergessenta dera arquitectura gotica. De hèt, date, apruprètz, de finaus deth sègle XIII o començaments deth sègle XIV, e compde damb era campana mès antiga que se consèrve en Aran.

Campanau d’Arròs. Campanau d’Arròs.