Eth Conselh Assessor dera Lengua, format per representants der Institut d’Estudis Aranesi, eth sector educatiu, era societat civil e es mieis de comunicacion, defen qu’era Lei der aranés consagre era unitat dera lengua occitana, atau coma era sua diversitat, en especiau atencion ar occitan que se parle en Aran.

Entath Conselh Assessor, ei fòrça important qu’era Lei respècte era identificacion des persones que parlen er occitan en Catalonha damb era varietat dialectau qu’usen abitualament.

Eth Conselh Assessor dera Lengua ei er organ consultiu deth Conselh Generau d’Aran entàs ahèrs de politica lingüistica. Aguest organ, constituït en hereuèr de 2009, collabòre en ordenament dera politica de supòrt e promocion der aranés, pr’amor qu’eth Govèrn d’Aran a era competéncia plea en tot aquerò que hè referéncia ath foment e ensenhament der aranés, atau coma establís era Lei d’Aran de 1990.

Eth Govèrn d’Aran a convocat, entàs pròplèu dies, amassades damb representants deth collectiu de mèstres, representants der IEA e associacions dera lengua, atau coma damb es alcaldes e representants des grops politics deth Conselh. Damb aguesta convocatòria, eth Conselh cerque eth consens e un posicionament unitari dauant era naua Lei der aranés.