Francés Boya a declarat qu’era possiblitat de bastir en Aran eth prumèr altipòrt der Estat “permeterie mielhorar es infraestructures d’accès ath territòri, que patís un deficit istoric enes comunicacions”. El altipòrt se harie en tot profitar eth pendent dera montanha e acuelherie aeronaus de mida petita e mieja. Es expèrts calculen qu’era infraestructura non serie guaire costosa e que poderie atrèir a fòrça usatgèrs qu’aspire a captar er aeropòrt d’Alguaire.

Eth sindic a explicat que “cau seguir eth modèl des Alps francesi” entà poder amiar as toristes dirèctament entàs pistes, sense besonh d’un viatge damb coche de dues ores e mieja des de Lleida. Ath delà, “era infraestructura poderie profitar-se en un futur entà hèr servicis d’aerotaxis”, segontes eth conselhèr Serrano.

Aguesta infraestructura de caractèr esportiu ei contemplada peth Plan d’Aeropòrts, Aerodròms e Elipòrts de Catalonha 2009 – 2015, qu’era Generalitat ve factible de plaçar ena Val d’Aran, dempús dera demana qu’en aguest sens corsèc eth Conselh quan s’aprovèc eth Plan.

Er altipòrt ei ua infraestructura de nauta montanha, presenta en zònes coma es Alps, que s’adrèce entara aviacion generau, especiaument entath sector toristic e emergéncies. Se caracterize per disposar d’ua pista lèugerament inclinada que pòt èster operativa damb nhèu.

Amassada deth sindic damb eth director generau de Pòrts. Amassada deth sindic damb eth director generau de Pòrts.