Es grops parlamentaris que dan supòrt ath Govèrn (PSC, ERC e ICV) e CiU an rebotjat era esmenda ara totalitat qu’auie presentat eth PP contra era Lei der aranés. Damb aguesta votacion, era Cramba catalana amie entà dauant era tramitacion dera norma, damb procediment d’urgéncia. “Aguest procès mos a d’amiar de cap tath reconeishement des drets des ciutadans d’Aran dauant dera Generalitat e es institucions araneses”, a afirmat eth Sindic en session plenària, qu’a definit Aran coma “un territòri singular damb ua identitat plurau e dubèrta”.

Atau madeish, Francés Boya, qu’a reconeishut qu’era tramitacion dera Lei ei “un pas important”, a defenut “eth pacte entre Catalonha e Aran” e s’a referit ath besonh de “hèr passi en d’auti encastres entà estacar eth projècte compartit entre es pòbles aranés e catalan”. “Credem fermamènt qu’eth combat d’Aran e er aranés ei tanben era luta de Catalonha e era lengua catalana”, atau coma a proclamat.