Eth traductor, frut d’un acòrd entre eth Conselh Generau e era Secretaria de Politica Lingüistica dera Generalitat, a estat elaborat per ua comission lingüistica formada per dus representants de cada varietat dialectau der occitan e per ua comission tecnica de seguiment, e a compdat damb supòrt academic e d’ua empresa especializada, que n’a hèt era version definitiva.

Ara presentacion i an assistit tanben era directora generau de Politica Lingüistica, Paquita Sanvicen, e eth director entara creacion dera Oficina der Occitan en Catalonha, Jusèp Loís Sans.

Cau rebrembar qu’era lengua occitana non ei estandardizada e que pr’amor d’açò, eth traductor serà iniciaument en ua forma lengadociana longa, damb era perspectiva dera adaptacion as granes formes dera lengua occitana. En aguesti moments, ven de constituir-se, eth passat dijaus en Tolosa, era associacion de prefiguracion dera Acadèmia dera Lengua Occitana, que compdèc damb era participacion deth sindic Francés Boya. Era Acadèmia serà er organisme regulador que s’encuedarà d’aguesti ahèrs.