Era administracion catalana rebotge eth pagament de bestiar desapareishut presumptament a causa der os, pr’amor que “entre de plen en contra dera legislacion vigenta en matèria de responsabilitat patrimoniau”, atau coma a manifestat eth director generau de Miei Naturau, Joan Pallisé, en andues cartes adreçades ath sindic Francés Boya de 17 de deseme de 2007 e de 25 de gèr de 2008, respectivament, e des qu’eth Sindic n’a hèt rebrembe en transcurs deth Plen amassat aué en session extraordinària.

Francés Boya a explicat qu’en cambiar eth sistèma de pagamanent des ajuts, eth Conselh Generau s’a vist ena obligacion de cercar naues vies entà balhar supòrt as pagesi damb mesures preventiues en tot hèr ua inversion de mès de 50.000 èuros en ajudes dirèctes (20 èuros per cap de bestiar en zòna d’especiau incidéncia der os e 15 èuros per cap ena rèsta) e ua auta de 17.000 èuros entà infraestructures (passi canadenqui e un barratge en Horno). De manèra qu’ath delà des pagaments efectuadi pes danhs d’os comprovadi, eth Conselh a desvolopat aguestes naues mesures extraordinàries finançades peth ministèri de Miei Ambient, er impòrt des quaus (70.000 èuros) se place peth dessús des 25.000 èuros qu’Aran recebie de mieja damb eth vielh sistèma d’ajuts pes atacs d’os, qu’includie es pagaments des caps comprovadi e des desapareishudi.

En aguest sens, eth Plen deth Conselh Generau a prenut er acòrd unanim entà qu’era Generalitat reconeishe Aran coma zòna preferenta pes danhs que genère er os, pr’amor qu’eth sector ramadèr aranés ei eth que patís mès era incidéncia deth plantigrad en encastre deth Pirenèu catalan.